Sekretari për Çështjet Ligjore në PD, Gazmend Bardhi, në një prononcim për mediat pas përfundimit të dhënies së dëshmisë në Gjykatën e Krimeve të Rënda, tha se çështja “Babale” është përdorur politikisht nga prokuroria. Ai shtoi më tej se ende nuk ka një rezultat për këtë hetim, duke e cilësuar një proces të montuar politikisht ndaj opozitës.
“Më thirrën si dëshmitar, në 4 shtator me vullnetin tim të lirë jam paraqitur në gjykatë. S’pati asnjë përballje. Zotëria pretendoi se më ka takuar, por unë e pashë për herë të parë në Gjykatë, dhe se njoh. Ndryshe nga Albert Veliu, të cilin e njoh dhe e kam takuar atë natë para se të nxirrnim dosjen. Çdo denoncim që ka bërë PD me përdorim politik nga prokuroria për të bërë mbrojtjen e vëllait të Fatmir Xhafës, vazhdon sot. Sot, që ne flasim s’ka asnjë rezultat për këtë hetim. Edhe ligji anti-mafia, s’veproi. Duan të na mbyllin gojën, gjithçka është politike. Procesi, i montuar politikisht ndaj opozitës. Duan të na intimidojnë për të mos denoncuar”.
