Janë mbyllur pjesët e para të dy supersfidave të Champions League që po zhvillohen në Manchester dhe në Amsterdam.
Manchester United-Barcelona është zhbllokuar në minutat e para. Kanë qenë miqtë që kanë kaluar në avantazh në minutën e 13-të falë një goli me kokë të Luis Suarez. Arbitri anësor e ka anuluar për pozicion jashtë loje, por VAR ka treguar se uruguaiani ka qenë në pozicion të rregullt.
Chris Smalling e kishte mirëpritur sfidën më të vështirë që mund të ketë një mbrojtës, të markojë Lionel Messi-n. Megjithatë, gjatë një aksioni ai ka shkelur rregullat duke e goditur me bërryl sulmuesin argjentinas. Një incident që ka lënë të gjakosur Messi-n, i cili pasi ka marrë trajtimin e mjekëve është rikthyer në fushë.
Pjesa e parë e Ajax-Juventus është mbyllur 1-0 në favor të miqve. Pas shumë rasteve të shpërdoruara nga vendasit, ka qenë Cristiano Ronaldo (kush tjetër) ai që ka zhbllokuar takimin në fundin e 45 minutave të para.
CR7 ka dërguar topin në rrjetë me një goditje me kokë pas një krosimi perfekt nga Joao Cancelo.
Në momentin e festimit, drejt yllit portugez kanë fluturuar disa objekte nga tifozët holandezë, me njërin prej tyre që ka provuar të futet në fushë, por që është ndalur nga forcat e sigurisë.
