Edinson Cavani ka zbuluar se ka kërkuar ndihmë mjekësore për t’u përballur me problemet e pagjumësisë, të shkaktuara nga humbja dramatike e PSG ndaj Barcelonës në Ligën e Kampionëve (2016-2017).
Gjigantët francezë e mundën ekipin katalanas 4-0 në ndeshjen e parë, por u mposhtën 6-1 në “Camp Nou”, në sfidën e kthimit, duke u eliminuar në mënyrë dramatike nga ky kompeticion.
Cavani dhe shokët e skuadrës po përparonin në çerekfinale, deri kur Sergi Roberto shënoi golin e gjashtë për të tijtë, në minutën e 95-të, dhe siguroi përmbysjen spektakolare.
Në një intervistë për ESPN, Cavani pranoi se kjo disfatë ndikoi në jetën e tij për njëfarë kohe. 32-vjeçari tha:
“Ajo ndeshje më preku shumë. Askush nuk e imagjinonte dot se çfarë mund të kishte ndodhur. Unë nuk isha në gjendje të flija, në më zinte gjumi, kështu që e kalova kohën duke lexuar.
Pastaj fillova të shqetësohesha, sepse duhej të shkoja në stërvitje pa i mbyllur fare sytë gjatë natës. Mjeku më vizitoi dhe më dha një ilaç për të më ndihmuar të fle. I ndihmuar edhe nga titulli kampion në Francë, arrita të fle pak e nga pak”, shkruan telesport.
Trauma ishte e kuptueshme, pasi Barcelona u bë skuadra e parë ndonjëherë, që përmbyste një disavantazh prej katër golash (nga ndeshja e parë) në Champions.
Sulmuesi uruguaian luan me parizienët që nga vera e vitit 2013 dhe ka shënuar 134 gola për klubin, përfshirë 23 gola në sezonin 2018-2019. Ai ka fituar 14 trofe kombëtarë me PSG, duke përfshirë pesë tituj të Ligue 1.
