Pas publikimit të dy rasteve, babë e bir të infektuar me koronavirus, me rëndësi është vetë-ndërgjegjësimi, duke iu bindur të gjithë rregullave për parandalimin e përhapjes së virusit. Kjo si një masë për të mbrojtur të gjithë shoqërinë.
Ministrja e Infrastrukturës dhe Energjisë, Belinda Balluku, ka informuar qytetarët shqiptarë, lidhur me masat e ndërmarra nga përhapja e koronavirusit.
“Sot kemi vendosur që të ndërpresim të gjitha akseset e transportit ajror dhe atij detar me pikat e ashtuquajtura të kuqe, dhe zonat përreth këtyre pikave në shtetin fqinj të Italisë. E kuptojmë që është vendim drastik, por jemi në situatë të jashtëzakonshme. E për të ulur shanset e prekjes nga virusi duhet ruajtur qetësia, s’ka asnjë arsye për panik”.
Ministrja ka sqaruar se ky urdhër prek vetëm pasagjerët, dhe jo avionët me mallra. “Urdhri për ndalimin e fluturimeve i referohet vetëm pasagjerëve. Pas shumë telefonatave që kemi marrë nga shumë pasagjerë dhe kompani transporti, duhet te sqaroj se i referohemi vetëm rasteve të pasagjerëve. Për mallrat s’ka pezullim të avionëve kargo që vijnë apo ikin nga Shqipëria për destinacionet e mesipërme”.
