Kreu i grupit parlamentar të PS, Taulant Balla bën me dije se ka zhvilluar një takim me ministrat e jashtëm të Polonisë, Lituanisë, Estonisë dhe Letonisë.
Në postimin e tij në Facebook, Balla shkruan se ata kanë shprehur mbështetjen e tyre për hapjen e bisedimeve për Shqipërinë dhe Maqedoninë e Veriut me BE.
Sipas tij, metodologjia e re e BE për zgjerimin i ka ofruar Ballkanit Perëndimor një plan të besueshëm në rrugën evropiane bazuar mbi meritën individuale.
“Është tashmë në kredibilitetin e BE, që Këshilli Evropian i fund-Marsit të miratojë fillimin e bisedimeve për anëtarësim me Shqipërinë dhe Maqedoninë e Veriut”, shkruan Balla ndër të tjera në postimin e tij.
Postimi i plotë:
Mirënjohje Polonisë, Letonisë, Lituanisë dhe Estonisë për mbështetjen që i japin Shqipërisë për fillimin e menjëhershëm të bisedimeve për anëtarësim në Bashkimin Europian??. Sot pasdite patëm mundësinë të takohemi me ministrat e jashtëm të Polonisë Jacek Czaputoëicz, të Letonisë Edgars Rinkēvičs, të Lituanisë Linas Antanas Linkevičius, si dhe me zv/ministrin për Çështje Evropiane të Estonisë Märt Volmer.
Komisioni Europian, përmes Metodologjisë së re të Zgjerimit, i ka oftuar vendeve të Ballkanit Perëndimor një plan të besueshëm në rrugën europiane dhe të bazuar në meritën individuale të seicilit prej vendeve të Ballkanit Perëndimor.
Komisioni Europian përmes raportit të publikuar të henën rikonfirmoi vlerësimin e qartë se Shqipëria dhe Maqedonia e Veriut janë gati për të filluar menjëherë bisedimet për anëtarësim me Bashkimin Europian??.
Metodologjia e re e Zgjerimit zgjidh gjithashtu edhe hezitimin e tetorit të shkuar të ndonjë prej vendeve anëtare të BE, pozicioni i të cilave divergjoi mbi shpejtësinë dhe axhendën e procesit. Është tashmë në kredibilitetin e BE, që Këshilli Europian i fund-Marsit të miratojë fillimin e bisedimeve për anëtarësim me Shqipërinë dhe Maqedoninë e Veriut.
