Kryetari i Grupit Parlamentar të Partisë Socialiste Taulant Balla i shoqëruar nga Ministrja e Arsimit Evis Kushi dhe kryetari i Bashkisë, Gledian Llatja zhvilluan një takim me me gratë anëtare të Këshillit Bashkiak të Elbasanit.
Në fjalën e tij Balla tha se qasja e PS në qeverisje ka në themel shpirtin e protestës ndaj problemeve me të cilat përballen realisht qytetarët e thjeshtë çdo ditë, në çdo zyrë shteti.
Balla u shpreh se PS është partia e vetme në Shqipëri ku ka bashkëdrejtim mes grave dhe burrave.
Ai ftoi gratë që të bëhen pjesë e Partisë Socialiste.
Fjala e Taulant Ballës
Bashkë me Evisin dhe Gledin u takuam me gratë anëtare të Këshillit Bashkiak të Elbasanit.
“Ne socialistët shqiptarë jemi progresistë, nuk jemi konservatorë, jo për definicion, por se na dallon me të tjerët reagimi instiktiv, i përditshëm, refuzimi, dhe përpjekja për të shëruar çdo njësi shërbimi publik ku qytetarët nuk marrin si duhet shërbimet, ku ka korrupsion e të cilat ne duhet të vazhdojmë ti reformojmë.
Prandaj qasja jonë në qeverisje ka në themel shpirtin e protestës ndaj problemeve me të cilat përballen realisht shqiptarja e shqiptari i thjeshtë cdo ditë, në cdo zyrë shteti, në cdo bashki, në cdo shërbim publik etj.
Brenda PS kemi zhvilluar prej disa muajsh një proces ripërtëritës, ri-organizimi, ku kemi synuar rritjen e peshës së grave e të vajzave në drejtimin e strukturës bazë të Partisë Socialiste.
Jemi partia e vetme në Shqipëri që kemi bashkëdrejtim mes grave dhe burrave në organizatat tona në çdo lagje qyteti apo në cdo fshat. Duhet të vijojmë të ftojmë sa më shumë gra të bëhen pjesë e Partisë Socialiste.”
