Balla paralajmëroi shkarkimin/ Meta: Presidenti, gati të firmosë dekretin

Presidenti i Republikës, Ilir Meta ka reaguar pas deklaratës së numrit dy të Partisë Socialiste, i cili paralajmëroi shkarkimin e tij, pas procesit të numërimit të votave.

Sipas Metës, kërcënimet ndaj tij vijnë përmes Ballës nga bandat e Elbasanit dhe të gjithë Shqipërisë.

Meta u shpreh se është gati për të firmosur Dekretin për mbrojtjen e Republikës.

”Kërcënimi i fundit, që vjen përmes Tao Taos, nga bandat e Elbasanit dhe të gjithë Shqipërisë ka vetëm një përgjigje: Presidenti, gati për të firmosur Dekretin për mbrojtjen e Republikës! Shqipëria e Shqiptarëve!  Vdekje tradhëtarëve!’’, shkruan Meta në rrjetin social, Facebook.

Pas përfundimit të procesit të numërimit të votave, pritet një beteje e ashpër midis mazhorancës dhe Presidencës. Pak para zgjedhjeve, Presidenti Meta deklaroi se do të jepte dorëheqjen nëse kryeministri Edi Rama do të fitone 71 mandate pa cënuar asnjë votë.

Por, një gjë e tillë nuk ka ndodhur, ndaj dhe Partia Socialiste do të ndërmarrë hapat ligjorë për shkarkimin e tij.