Kreu i grupit parlamentar të PS-së, Taulant Balla në seancën e sotme plenare u bëri thirrje deputetëve të opozitës të votojnë ligjet e mbetura të reformës në drejtësi, ndërsa akuzoi opozitën e “vjetër”, si penguese të reformave dhe kundër integrimit të vendit në Bashkimin Evropian.
Teksa tregon përqindjen e madhe të shqiptarëve që kërkojnë integrimin në familjen evropiane, Balla ka theksuar se: “Nuk ka politikanë më me fat se ne që kemi një popull që na mban të orientuar në rrugën evropiane, 8% e atyre që nuk janë pro Evropës janë këta që bllokojnë rrugët”.
Sa i përket paralizimit të qarkullimit rrugor nga opozita dhe dhunës së ushtruar në protesta, Balla shprehet se janë pjesë e përpjekjeve për të dëmtuar të ardhmen evropiane dhe fillimin e bisedimeve.
“Kush guxon të godasë policinë do marrë ndëshkimin që meriton dhe plotësimet e mangësive në Kodin Penal janë pikërisht në bindjen se dhuna nuk mund të tolerohet. Ndëshkimi me burg është për t’i vënë gishtin kokës që cdo politikan i papërgjegjshëm që teksa shqiptarët që kthehen nga puna të presin sa Luli, Mona, Saliu, Mziu të plotësojnë kuotën e protestës javore në planifikimin që politikanë të korruptuar në përpjekje për të penguar të ardhmen evropiane të vendit bëjnë”, deklaroi ai.
