Taulant Balla, kreu i grupit parlamentar të Partisë Socialiste ka deklaruar sot se bizneset e familjes së Lulzim Bashës janë shtuar gjatë qeverisjes së PS-së. Balla e cilëson si një aktrim nga ana e Bashës kur ankohet për kushtet e biznesit, ndërsa vetë ai dhe familja e tij ushtrojnë bizneset në pronat e atyre që i quan biznesmenë të mëdhenj.
Gjithashtu Balla ka bërë edhe një tjetër deklaratë goditëse, ku tha se beson që bizneset e Bashës janë me problematika dhe duhen hetuar.
“Mund të verifikoni dhe të shikoni bizneset e familjes së Lulzim Bashës që janë shtuar disa herë me të ardhura gjatë qeverisjes së Partisë Socialiste. Unë kam dyshime që janë biznese me parregullsi dhe që duhen hetuar. Nuk ka shembull më kuptimplotë kur ka një opozitë që me lotë krokodili u qahet dhe qan për bizneset gjatë ditës, dhe kryetari gjatë natës strehohet në vila apo ushtron bizneset familja e tij në pronat e këtyre që etiketohen si biznesmenë të mëdhenj. Mjafton të shikosh shifrën e bizneseve personale të shtuara gjatë kësaj periudhe për të kuptuar që në këtë qeverisje janë krijuar mbi 300 mijë vende pune” deklaroi Balla.
