Balla me tone të ashpra: Meta ka degraduar, Basha të distancohet prej tij

Sekretari i Përgjithshëm i Partisë Socialiste, Taulant Balla, tha se presidenti Ilir Meta ka degraduar në deklaratat e tij ndaj Shteteve të Bashkuara.

I ftuar në ”Real Story”, Balla sugjeroi që kryetari i PD-së, Lulzim Basha, të distancohet nga reagimet e presidentit.

PD, nuk bën qoftë një distancim nga deklarata e presidentit, ku tha se ai merr për veshësh sekretarin e shtetit amerikan. Ti kupton që udhëheqësi s’është Basha, ai është kukull, ata që e komandojnë fshihen në presidencë dhe një tjetër në kullën prapa presidencës. Ajo që është më e rëndë është, e papranueshme që në 2021, Shqipëria të ketë një president republike që bie ndesh me aspiratën e shumë shqiptarëve që vlerësojnë SHBA-në si parter strategjik. Sot partia demokratike, mbështet, në mënyrë “de facto” Ilir Metën që thotë do të kapë për veshi sekretarët amerikanë.

Më vjen keq për degradimin personal të Ilir Metës, nuk e di ç’janë këto hip hopet e tij. Para reformës në drejtësi ka pasur një shpërthim të Ilir Metës kundër SHBA, atëherë nuk u bë publike, por këto shpërthime më kujtojnë rastin e ish-kryetarit të parlamentit rumun, i cili u fut në listën e zezë të SHBA, pasi u arrestua. Unë thash pasi dhe rasti i këtij politikani ishte i përsëritur kundër SHBA”, tha Balla.