Më herët, prokurori i Durrësit Arjan Ndoj, mohoi të ketë parë autorët e atentatit që ndodhi ndaj tij në 1 nëntor, tek mbikalimi i Shkozetit. Kolegët nga Krimet e Rënda e kanë pyetur në katin e dytë të spitalit të Durrësit.
Ai ka shtuar se nuk ka vënë re asgjë të dyshimtë, deri në momentin kur breshëritë e armëve janë derdhur mbi makinë. SHÇBA ka nisur verifikimet për zinxhirin komandues në policinë e Durrësit. Pasi zona ku ndodhi ngjarja në zonën e Shkozetit, patrullohet thuajse 24 orë nga forcat e policisë.
Pikëpyetje të shumta janë ngritur nga grupi hetimor, pasi nga koha kur ndodhi atentati policia mbërriti 20 minuta më pas. Sakaq, më parë kishin mbërritur miqtë e të plagosurve, të cilët janë filmuar duke nxjerrë të plagosurit nga makina.
Policia dhe Prokuroria e Krimeve të Rënda dyshojnë se objektiv i atentatit ka qenë Arjan Ndoja. Në sajë të verifikimeve të bëra, rezulton se automjeti luksoz përdorej nga prokurori, ndonëse nuk ishte regjistruar në emër të tij.
Verifikimi ka nxjerrë se siguracioni i automjetit, figuronte të ishte paguar nga bashkëshortja e prokurorit Ndoj. Ç’ka ka shtuar dyshimin se objektiv i atentatit mund të ketë qenë prokurori. Pa përjashtuar mundësinë se shënjestër mund të ketë qenë Landi Muharremi.
Sa i takon motivit, dyshohet se ai ka lidhje me hetimin e çështjes së pronësisë së tokave në Gjirin e Lalzit. Troje të cilat dyshohet se i morën jetën disa vite më parë gjyqtarit të gjykatës së Vlorës, Skerdilajd Konomi, ndërkohë autorët nuk janë zbuluar.
Nga ana tjetër, vijon këqyrja e automjetit që dyshohet se u përdor nga autorët, brenda të cilit u gjetën dy armë kallashnikov.
