Detaje të reja janë zbuluar sa i takon masakrës që ndodhi dje në kryeqytet, në zonën “Don Bosko”. Menaxheri i lokalit ku ndodhi vrasja, ka rrëfyer se viktima Erion Çela para se të ndodhte ngjarja, ishte në kafe me bashkëshorten. Ndërsa për disa minuta më vonë ai është ulur me persona të tjerë.
“U ulën tek tavolina afër xhamit. Por nuk kemi dëgjuar konflikte. Ndërsa 19-vjeçari ishte klient në një tavolinë tjetër”, ka treguar menaxheri i lokalit.
Viktima, Erion Çela i cili së shpejti do të bëhej baba, kishte një dyqan cigaresh dhe shpesh ftonte të vëllain, dajën ose ndonjë mik për të kaluar pasditen në lokalin ngjitur me dyqanin.
Sipas grupit hetimor, objektiv ka qenë daja i vëllezërve Çela, i plagosuri Edmond Cëroi dhe dyshohet se autorët i kanë ndjekur prej kohësh lëvizjet e tij dhe kanë pritur rastin për ta goditur. Por breshëria e kallashit i mori jetën Erion Çelës, ndërsa i plagosuri mbeti edhe vëllai i tij Blerimi.
