Mesditën e 11 tetorit, 19-vjeçari Ilirjan Hasanaj iu afrua mjetit të shefit të Policisë Bashkiake, Mentor Hasanaj dhe shtiu 7 herë me armë zjarri. Nga sulmi me armë zjarri mbetën të plagosur shefi i Policisë dhe babai i tij 74-vjeçar, Xhelali.
Bashkë me ta në makinë ka qënë edhe bashkëshortja e shefit, Vjollca Hasanaj 28-vjeç, por kjo e fundit nuk u plagos. 19-vjeçari është vetëdorëzuar një ditë më parë në polici, ndërsa dëshminë për ngjarjen e plotë e ka dhënë sot.
Në dëshminë e tij, 19-vjeçari ka pranuar akuzat dhe ka thënë se gjithçka ndodhi pas një konflikti pronësie. Lidhur me këtë ngjarje, policia njofton se janë arrestuar Ilirjan Hasanaj, 19-vjeç dhe bashkëpunëtori tij, (kushëriri) Verzan Bajrakurtaj. Ndërkohë, uniformat blu bëjnë me dije se po vijojnë hetimet për personat e tjerë të implikuar në këtë ngjarje.
Njoftimi
Vihet ne pranga autori i dyshuar i ngjarjes se ndodhur me datë 11.10.2020, ku mbetën të plagosur shtetasit M. H. dhe Xh. H. Arrestohet dhe një shtetas tjetër si bashkëpunëtor. Nga strukturat hetimore të DVP Shkodër u bë ndalimi i shtetasit I. H. 19 vjeç, banues në lagjen “10 Korriku”, Shkodër.
Gjithashtu nga veprimet hetimore u bë ndalimi edhe i bashkëpunëtorit të tij shtetasit V. B. 23 vjeç, banues në lagjen Dobraç, Shkodër.
Nën drejtimin e Prokurorisë, Strukturat hetimore të DVP Shkodër vijojnë veprimet hetimore për zbardhjen e rrethanave dhe qëllimit të ngjarjes, identifikimin, kapjen dhe arrestimin e personave të tjerë të implikuar në këtë ngjarje. Materialet iu referuan Prokurorisë së Rrethit Gjyqësor Shkodër, per veprime të mëtejshme.
