Një atentat ka ndodhur mbrëmjen e sotme në qytetin e Tepelenës, ku 54-vjeçar është qëlluar për vdekje me armë zjarri. Viktima është identifikuar si Çajup Selimi.
Sipas informacioneve paraprake, mësohet se Selimi është qëlluar në momentin që po futej në shtëpinë e tij, nga persona ende të paidentifikuar.
“Rreth orës 21:15 në qytetin Tepelenës, në lagjen “15 Shtatori”, në rrethana ende të paqarta është plagosur me armë zjarri shtetasi Ç.S., rreth 45 vjeç, i cili ka humbur jetën në Spitalin Rajonal Gjirokastër si pasojë e plagëve të marra.”, informon policia.
Selimi ishte pronar i një biznesi në Tepelenë, ndërkohë që deri më tani nuk bëhen të ditura shkaqet e vrasjes.
Policia dhe grupi hetimor kanë mbërritur në vendin e ngjarjes dhe po hetojnë në lidhje me rrethanat e krimit të rëndë.
