“Asnjë diskutim për lokale deri në 11 maj”, çfarë do ndodhë me berberët e dentistët

Kryeministri Edi Rama u shpreh se po shikohet mundësia e rihapjes së berberëve dhe dentistëve, por me protokoll sigurie. Në një bashkëbisedim me qytetarët në Facebook, kreu i qeverisë tha se situata po monitorohet. Po kështu, do të bëhet një analizë me ekspertët lidhur me procesin e hapjes së korridoreve ajrore.

“Do të hapemi me shumë kujdes dhe deri në, pas kësaj jave, dhe javës në vijim, do të bëjmë një analizë të thellë me ekspertët dhe komitetin lidhur me procesin e hapjes së korridoreve ajrore.

Në tërësi do të vijojmë me këtë regjim për korridoret ajrore. Lehtësimi do të vijë në proces. Mbeten në proces për t’u studiuar dhe për t’u lehtësuar, disa biznese, floktoret, berberët, dentistët.

Janë të rrezikshme, sepse mjafton që një nga klientët të infektojë berberin, parukierin apo dentistin. Të gjithë marrin infeksionet. Por me protokollet do të lehtësojmë edhe këtë aktivitet, dhe pastaj mbetemi te qendrat tregtare më parë dhe më pas restorantet dhe baret. Pas datës 4 maj nuk ka diskutim deri në 11 maj kur do të kemi një rivizitim të të gjithë situatës. Do të shikojmë edhe efektin e hapjes së zonave të gjelbra që do të zgjerohen”, tha ai.