Kreu i Kadastrës, Artan Lame është prononcuar sa i takon akuzave të Petro Koçit në drejtim të Kadastrës së Fierit, dhe ka kërkuar që politika të qëndrojë larg nga ky proces. Kujtojmë këtu se deputeti i Partisë Socialiste, Petro Koçi, tha se në Fier duart e krimit janë shtrirë mbi financat publike. Nisur nga këto akuza të forta, SPAK ka nisur verifikimin e këtyre deklaratave. Po sipas tij, trafikantë droge tashmë kanë legalizuar subjekte biznesi që fitojnë tendera publike. Marrë shkas nga ky denoncim, Kreu i Kadastrës pohoi se ai vetë po çon dosje me probleme për hetim të mëtejshëm, teksa i bën thirrje Prokurorisë dhe SPAK të ndihmojë Kadastrën në këtë proces.
“Hedhur akuza më duket fjalë e rëndë. Sidoqoftë pa dashur të hyj në polemika, politika ti rrijë larg këtij procesit. Të merret me vizion dhe drejtimin. Kapiteni i anijes le të drejtojë anijen, ai që mban motorin (Kadastra) le të na lëjë të bëjnë punën. Ndryshe, po ngatërruam rolet, anija ose nuk do ecë, ose do të përplaset diku. Politika të rrijë larg këtyre proceseve.
Unë vetë si drejtor i përgjithshëm i Kadastrës, kam çuar dhe po çoj dosje për hetim të mëtejshëm, me një arsyetim shumë të thjeshtë. Ka dy kategori dosjesh me probleme, e para mitmarrja, gjoba, futja e dorës në xhepin e tjetrit. Dhe e dyta janë problematikat e trashëguara, shit-blerjet e dyshimta, regjistrime të dyshimta, troje të dhëna këtu e të regjistruara në vend tjetër. Kjo kërkon kohë. Me të dy këto procese po ecim. Bujrum kush të dojë, le të vijë Prokurori dhe SPAK të na ndihmojë në këtë proces”, tha Artan Lame.
