Artan Lame, Drejtori i Agjencisë Shtetërore të Kadastrës, ka treguar kërcënimet që ai ka marrë sa i përket çështjes së pronave në bregdet. I ftuar në emisionin “Opinion”, Lame hodhi dritë mbi faktin nëse ruhet nga efektivë të policisë.
“Erdha me ndonjë polic unë? Nëse nuk i fut dorën njeri në xhep, nuk ka ndonjë…”, tha Lame, sa i përket pyetjes nëse ruhet nga efektivë të policisë.
I pyetur drejtpërdrejt nëse kishte marrë kërcënime, Drejtori i Agjencisë Shtetërore të Kadastrës tha troç se ka marrë kërcënime. Madje ai e cilësoi këtë si një situatë normale, dhe se asnjë nga drejtorët aktualë nuk është në mbrojtje.
“Ka ndonjë shqiptar që është marrë me pronat, dhe s’ka marrë kërcënim? Ka nga më të ndryshmet, dhe deri tek kërcënimet serioze që i kam referuar aty ku duhet. Është mëse normale që mund të ketë të tilla gjëra… Nuk rezulton që nga drejtorët aktualë të jenë nën mbrojtjen e policisë”.
