Dy ditë më parë u vu në pranga kreu i Organizatës së Veteranëve të Luftës së UÇK në Kosovë, Hysni Gucati. Njësia speciale e EULEX ka kryer një aksion të befasishëm në ambientet e Organizatës së Veteranëve të Luftës. Lidhur me këto zhvillime mjaft të forta në Kosovë, konstitucionalisti Shkëlqim Hajdari, tha se aty kishte edhe elementë show. Ai deklaroi se zhvillimet në Kosovë janë delikate, ndërsa analizoi çfarë ka në thelb kjo çështje.
“Zhvillimet në Kosovë janë delikate. Kanë disa muaj që kanë dalë në sipërfaqe, që në momentin kur tre ditë para realizimit të vizitës së presidentit Thaçi në SHBA, u bë publike hetimi i tij dhe ka vazhduar edhe me emra të tjerë që janë bërë publik në media, që janë ish-drejtues të UÇK, për të finalizuar në aksionin para 48 orëve ku u arresuan dhe u dërguan në Hagë kryetari i shoqatës së UÇK dhe ndihmësi i tij.
Po të shikosh deklarimet e prokurorëve dhe EULEX, ato kanë vepruar në këtë formë, sepse kanë prova, sepse zotërinjtë po merem me prishje provash. Po meren me shantazh ndaj dëshmitarëve. Për mendimin tim si prokuror, nëse i kanë të provuar, s’ke rrugë tjetër të përdorësh me këto subjekte penale. Ajo është çështje organizative. Mund të ishte bërë në një formë me racionale jo shumë e bujshme, sepse njerëzit aty ishin. Ka elementë show? Sigurisht ka elementë show, për të mos menduar se ato mund të kishin informacione të tjerë. Nuk mund të japësh definicione nga jashtë kur nuk e di procesin. Gjeja e mirë që po ndodh në Kosovë, si faktor politik i Kosovës si faktori euroatlantik, BE, SHBA, po ndajnë me thikë hetimin e disa zyrtarëve të UÇK, me luftën e drejtë që ka bërë populli shqiptar në Kosovë”, tha ai.
Policë të armatosur të EULEX-it bastisën Organizatën e Veteranëve të Luftës së Ushtrisë Çlirimtare të Kosovës, dhe arrestuan kreun e saj, pasi ai i bëri thirrje mediave të publikonin dosjet e rrjedhura nga Gjykata Speciale në Hagë.
Arrestimi i Gucatit vjen në mes të polemikave të vazhdueshme pasi Organizata e Veteranëve të Luftës së Ushtrisë Çlirimtare të Kosovës, pretendoi se ka marrë në mënyrë anonime një sasi të madhe dokumentesh të rrjedhura nga prokurorët e Hagës këtë muaj.
Gucati i ka bërë thirrje mediave në Kosovë të publikojnë dokumentet, pa zbuluar emrat e dëshmitarëve.
TIRANA TODAY
