Katër të burgosur janë arratisur nga një burg në Athinë. Fillimisht u raportua se ishin dy shqiptarë dhe dy gjeorgjianë, por tashmë konfirmohet se ta arratisurit janë 4 shqiptarë. Me një skemë si nëpër filmat aksion, ata mundën të arratisen nga burgu i Petrou Ralli në Athinë, rreth orës 7:30 të kësaj të hëne.
Dy nga shqiptarët e arratisur janë Endrit Bagaj, dhe Alesio ose Astrit Xhelo, që mbaheshin në një qeli, në pritje të transferimit në burgje të ndryshme të vendit.
Fillimisht njëri prej të arratisurve, ka kërkuar ndihmën e parë nga rojet duke u hequr se ishte sëmurë, por sapo ata kanë hyrë në qeli për të parë se çfarë po ndodhte, tre të dënuarit e tjerë i kanë kërcënuar, duke iu vënë armë të mprehta në fyt. Më pas shqiptarët iu kanë marrë armët e shërbimit dhe i kanë mbyllur policët në qeli.
Më pas ata zbritën në katin e parë, ku kapën në befasi një tjetër polic që ndodhej në makinën e transferimit. Fill pas kësaj ata morën makinën dhe u drejtuan në hyrjen e burgut ku përsëri kërcënuan me armë rojën.
Të arratisurit braktisën makinën e policisë pak metra larg burgut dhe u larguan në drejtim të panjohur.
Ngjarja në fjalë ka ngritur policinë greke në këmbë, e cila është vënë në kërkim të tyre. Në operacionin masiv policor u përdoren dhe helikopterë që mbulojnë nga orët e para të mëngjesit të gjithë Athinën. Ndërkohë deri tani është ndaluar vetëm një nga të arratisurit.
Pak ditë më parë të arratisurit ishin bërë protagonistë të një episodi dhune në burgun e Koridhalos në Athinë.
