Pas përfundimit të mbledhjes me drejtorët e qarkut në Vlorë, Edi Rama komentoi deklaratën e ambasadores së SHBA-së, Yuri Kim.
Kjo e fundit i rikujtoi kryeministrit Rama dhe liderit të opozitës, Lulzim Basha, marrëveshjen e 5 qershorit.
Në një komunikim për mediat, Rama u përgjigj shkurt se për ambasadorët flet në prezencë të tyre: “Për ambasadorët flas kur jam me ta”, tha Rama.
Kreu i qeverisë tha se Vlora duhet të ketë miliona turistë në vitet e ardhshme, teksa theksoi se energjia e infrastrukturës do të tejçohet dhe në periferi apo komuna.
“Sot dikush në periferi të Vlorës thotë dikush këtu asgjë s’është bërë. Më parë pritshmëria nuk ekzistonte, kurse sot ka pritshmëri. Mandati i 3-të për Vlorën do të jetë çuarja e infrastrukturës së energjisë brenda periferive dhe komunave. Ka shumë për të bërë, nuk është objektiv për Vlorën, por duhet që Vlora në dekadat e ardhshme të ketë miliona turistë”, tha ai.
