Anxhela Peristeri drejt ‘Eurovisionit’? Drejtori i RTSH-së sqaron të vërtetën

Një sërë thashethemesh u publikuan në mediat rozë, duke i marrë si të mirëqena se Anxhela Peristeri ishte fituesja e festivalit të fundvitit. Por asgjë nuk ka të vërtetë në këtë mes, pasi festivali ende nuk është realizuar.

Mediat menjëherë publikuan lajmin se Anxhela ka kryesuar, e madje duke postuar edhe këngët pjesëmarrëse. Drejtori i RTSH-së, Martin Leka, ka hedhur poshtë këto zëra, duke e quajtur të pamundur diçka të tillë.

Në një prononcim për ‘abcnews.al’, ai tha se festivali do të mbahet në datat 16, 17 dhe 18 dhjetor. Fituesi që do të zgjidhet në “Festivalin e Këngës”, do të përfaqësojë vendin tonë në edicionin e ardhshëm të “Eurovision”, i cili do të mbahet në Holandë, nga data 18 deri më 22 maj.

“Është e pamundur të dalë fituesi, kur festivali nuk është zhvilluar ende. Po e qartësoj që “Festivali i Këngës” do të mbahet në datat 16, 17 dhe 18 dhjetor”, u shpreh ai.

Më tej, Leka ka deklaruar se nuk janë pjesë e jurisë anëtarët që janë përfolur nga Shefqet Aliu, Osman Mula, Spartak Tili, Erjon Sheme, Ruzhdi Keraj, Miron Kotani, Jaho Margjekaj, Kozma Dushi, Enver Shëngjergji, At Spiro Katundi dhe Rudolf Marku. Por bëhet fjalë për emra të tjerë dhe gjithçka është bërë për shkak të interesave personale.

“Gjithçka është bërë për shkak të interesave personale, nga njerëz që po mundohen të ulin figurën e festivalit të krijuar prej vitesh. Juria nuk është ajo e publikuar në media, emrat janë të tjerë.

I bëj thirrje portaleve të mos merren me intriga dashakeqe, po të tregon transparentë”, tha ai.