Një grup të rinjsh të Forumit Rinor të Partisë Demokratike i janë drejtuar sot selinë blu, për të zhvilluar një mbledhje, por kanë gjetur dyert të mbyllura. Më herët në selinë e PD-së ishin dhe disa anëtarë të Grupit të Rithemelimit, të cilët po ashtu nuk u futën dot brenda ambienteve të selisë blu. Disa prej anëtarëve të Forumit Rinor kanë thënë se kjo situatë nuk ka ndodhur kurrë më parë, dhe kanë kërkuar që PD-ja të jetë e hapur për të gjithë.
“Ne jemi një grup të rinjsh të Forumit Rinor të PD-së, dhe jemi thirrur për një mbledhje për protestën e së shtunës. Por ne nuk kemi mundur që të futemi në selinë e PD-së. Kjo është një gjë e turpshme, dhe nuk ka ndodhur kurrë më parë. Kjo është hera e parë që përballemi me këtë situatë. Nuk ka nevojë që të njoftohet administrata”, u shprehën ata.
Më tej ata pohuan se do të marrin pjesë në protestën e thirrur nga ish-kryeministri Sali Berisha, që do të zhvillohet ditën e shtunë. Një prej tyre, i prezantuar si anëtar i Kryesisë së FRPD, Mariglen Doçi tha se ai është krimineli për të cilin ka folur kryetari i PD-së Lulzim Basha, dhe se është burgosur që ai të bëhet kryeministër.
“Ftoj mediat të ndjekin fjalën e një krimineli. Unë jam Mariglen Doçi, anëtar i Kryesisë së FRPD dhe dua t’i them Lulzim Bashës, unë jam ai krimineli që po pëshpërisje në media dhe për shkak tëndin jam burgos, për të bërë ty kryeministër unë jam burgos.
Si unë janë dhe 3.300 qytetarë të tjerë, kriminelë, që janë proceduar, kanë qenë në burg për shkakun tënd, për të bërë ty kryeministër. PD nuk mund të mbyllet me hekura, ne nuk jemi kriminelë, jemi idealistë që e duam PD-në të çliruar jo me si këto metodat e tua. PD nuk duhet të ketë as dyer, sepse është simbol i lirisë. Më datë 8 do çlirojmë selinë tonë nga shpura jote, dhe më pas, hap pas hapi edhe Shqipërinë”, tha ai.
