Futbollisti i kombëtares shqiptare, Andi Lila, ka habitur me deklaratën e tij të fundit, teksa u shpreh se lojtarëve kuqezinj u është hequr dekorimi me pasaporta diplomatike.
I ftuar në emisionin “Procesi Sportiv” në Top Channel, Lila tha se me mbërritjen e ministrit të ri, Gent Cakaj, lojtarëve të kombëtares u është hequr kjo pasaportë.
“Dua të them një skandal që ka ndodhur. Dekorimin që na bëri kryeministri Rama, na e hoqi ky ministri i ri i jashtëm që ka ardhur, Gent Cakaj. Është vërtet e pakuptueshme. Pas gjithë asaj që bëmë në ato kualifikuese dhe asaj që kemi bërë në Beograd me Serbinë u pritëm si heronj dhe tani na dërgojnë në ‘humnerë’. Kjo është 100% e vërtetë”, deklaroi Lila.
Kujtojmë se pas kualifikimit në Europianin e 2016-s, ishte kryeministri Rama, ai i cili iu dhuroi pasaportat diplomatike të gjithë lojtarëve të kombëtares.