Analisti Enver Bytyçi shprehet se përpjekjet e Shqipërisë për të vendosur një bashkëpunim me Beogradin janë thika pas shpine për Kosovën.
I ftuar në studion e lajmeve në RTV Ora, Bytyçi deklaroi se kryeministri Edi Rama kërkon të kalojë një krizë të momentit, ndërsa shtoi se i gjithë debati është sajuar për të tërhequr vëmendjen nga dështimi i marrjes së negociatave me Bashkimin Evropian.
“Në rastin e sotëm shërbimi që i bëhet drejtpërdrejt dhe me iniciativë personale, pa konsultim, pa marrë mendimin e askujt, thjesht duke biseduar me Baton Haxhiun, politikave serbe në Kosovë dhe Ballkan është një shërbim i papranueshëm. Të përpiqet Shqipëria të vendosë një bashkëpunim të ngushtë me Beogradin, në kushtet e një konflikti të ashpër politik dhe jo vetëm, me autoritetet e Kosovës, institucionet e Prishtinës kjo është më shumë sesa një thikë pas shpine.
Rama është i pabesueshëm, ai kërkon të kalojë një krizë të momentit. I gjithë debati për mini shengenin edhe nga deklaratat e Zaev dhe Ramës arrijnë në këtë përfundim sepse ndryshojnë nga ato të Vuçiç, i gjithë debati është sajuar për të tërhequr vëmendjen nga dështimi i marrjes së lejes për të hapur bisedimet me BE”, tha Bytyçi.
