Avokati Spartak Ngjela shprehet se presidenti Ilir Meta po përpiqet të bllokojë Gjykatën Kushtetuese, me qëllim që të zvarrisë procesin e shkarkimit të tij. Emërimin e gjyqtarit Besnik Muçi, avokati Ngjela e konsideroi një tentativë të dëshpëruar të kreut të shtetit.
Në një prononcim për gazetën “Sot”, Ngjela theksoi se “fatin” e Metës e ka në dorë vetëm SHBA-të.
“Shkarkimi i Metës drejtohet nga të huajt dhe jo Muçi të shkoj atje, por të gjithë të shkojnë është ekspertizë ndërkombëtare.
Kjo është një përpjekje e dëshpëruar e Metës sepse ka qenë një forcë antiamerikane dhe tani ka frikë. Kujton se mund t’ia hedhë me këta që merr, po kush guxon ta shkelë ligjin nga këta gjyqtarë. Amerika e ka në dorë Muçin se nëse ai e luan bishtin e kalon në vetting.
Askush nuk mund të bëjë më lëvizje kundër Shqipërisë. Meta ka marrë rrugët dhe bën mirë të dorëzojë atë pasurinë dhe mos bëjë më nga këto lëvizje”, u shpreh avokati.
Nga ana tjetër, Ngjela nuk hezitoi të komentojë vendimin e KE-së për shtyrjen e negociatave me Shqipërinë. Sipas tij, Serbia, Rusia dhe së fundmi edhe Franca po synojnë ta orientojnë Shqipërinë drejt Lindjes, dhe ta largojnë nga Europa dhe politikat amerikane.
