Deputeti Enkelejd Alibeaj është futur në selinë e PD-së i shoqëruar nga rreth 4 roje private. Duket se këto masa janë marrë nga ana e tij, pasi deputeti Spartak Braho në emisionin “Zona Zero” në “Top News”, bëri një paralajmërim se në protestë mund të vritej deputeti i PD me inicialet E.A, që përkon me emrin (Enkelejd Alibeaj).
Nënkryetarja e PD-së, Grida Duma, teksa hynte në selinë blu, është pyetur nga gazetarët se si do e presë Partia Demokratike protestën e thirrur nga Berisha.
Ajo tha se pas mbledhjes së thirrur të Kolegjit të Kryetarëve, gjithçka do të vijojë normalisht.
A keni një skenar për ditën e sotme dhe si do e prisni protestën e orës 12:00?
“Të kryejmë mbledhjen, dhe pastaj gjithçka vijon normalisht”.
Policia e Shtetit ka blinduar zonën përreth Parlamentit dhe selisë së Partisë Demokratike. 15 automjete policie kanë zbarkuar në pjesën e njohur si zona ‘Akademia e Shkencave’, në krah të Parlamentit. Raportohet se përpos këtyre mjeteve, janë 3 autobote me ujë dhe 1 autoblindë e Forcave Speciale, RENEA, për t’iu paraprirë çdo situate të mundshme gjatë protestës së thirrur nga ish-kryeministri Sali Berisha para selisë së PD-së sot në orën 12:00.
