Kreu i Partisë Agrare Ambientaliste, Agron Duka, është shprehur i gatshëm t’i shtrijë dorën e bashkëpunimit kryeministrit Rama për rindërtimin e qytetit të tij të lindjes, Shijakut, si një nga zonat më të prekura nga tërmeti i 26 nëntorit. Në një prononcim për “Ora News”, Duka ka rrëfyer edhe si mund të realizohet ky lloj bashkëpunimi.
“Jam shijakas, kam lind dhe rrit në Shijak. I njoh shtëpitë e Shijakut me familje dhe numër anëtarësh. Nëse do të caktojë njeri në Shijak, të shkoj unë, por të mos prek lekë me dorë, por të monitoroj çdo lloj fondi që hidhet atje dhe mënyrën sesi. Të firmosin të dy palët dhe pastaj të bëhen investimet atje. Se pyes opozitën në këtë drejtim, le të më thërrasë. Ta monitoroj dhe të mos shkojë asnjë lek dëm. Jam gati ta bëj”.
Pavarësisht propozimit ndaj Ramës, ai e akuzon kryeministrin se vazhdon të bëjë politikë dhe show. “Ai vazhdon të bëjë politikë dhe show, sepse mundohet që këtë që ndodhi ta kthejë në favor të vet, piarin e ka të fortë.
Sajon ngjarje të tilla dhe më duket sikur po ndodh anasjellta. Ndërsa opozita po mundohet të nxjerrë në pah problemet reale që janë pos tërmetit, mazhoranca po bën show dhe politikë”.
Jashtë vëmendjes së kryetarit të Partisë Agrare Ambientaliste, nuk kanë mbetur edhe dëmet e shkaktuara nga tërmeti në qytetin e Durrësit, për të cilat akuzon në mënyrë direkte Bashkinë e qytetit për papërgjegjshmëri.
“Qeveria vendore ka fajet e veta, sepse po të vini re pallatet dhe hotelet që janë shembur, kanë pasur ndërtime pa leje rreth 3-4 kate”.
