Shkon drejt zbardhjes vrasja e biznesmenit Ilir Rexhepi në Elbasan. Gjykata e Elbasanit ka shpallur në kërkim Mihal Toshin, i njohur si Mirgen Toshi, i cili është i dyshuari kryesor për vrasjen e biznesmenit Ilir Rexhepi më 30 dhjetor 2011.
Sipas vendimit të Gjykatës së Elbasanit, Toshi është zbuluar nga një analizë ADN-je e gjakut që u gjend në vendin e krimit ku u ekzekutua biznesmeni. Pasi ka marrë përgjigjen e rezultateve të ADN-së, Gjykata ka kërkuar edhe kapjen e tij. Nuk dihet ende si do të veprohet për rastin e Toshit, pasi ai tashmë ndodhet në një burg në Selanik, i akuzuar për trafik droge dhe i dënuar me 16 vite burg.
Mihal Toshi, njihet edhe si vëllai i Damiano Toshit, i cili është dënuar nga gjykata e Elbasanit me burgim të përjetshëm për vrasjen e dy basketbollistëve të “Skëndërbeut” në Korçë, Sokol Jahollarin dhe Rafael Rizan, si dhe plagosjen e Julian Beckës, më 3 shtator 2004. Sipas hetimeve rezultoi se vrasja nga Damiano ooishte nisur për Klajdi Jahon, por ky i fundit i kish lënë makinën basketbollistëve.
Ndërkohë përveç ekzaminimeve për Mihal (Mirgen) Toshit, Prokuroria e Elbasanit pak kohë më parë, ka kërkuar të ekzaminohen profilet gjenetike edhe për Olsi (Jorgo) Leku, i cili akuzohet se ka marrë pjesë në vrasjen e Gentian dhe Nezir Beqirit. Por, sipas burimeve hetimore, ende nuk ka përgjigje nëse gjurmët e gjetura janë të njëjtat me ato të vendit ku u gjet i vrarë Ilir Rexhepi./ Tirana Today
