Në një raport të publikuar ditën e sotme, Departamenti Amerikan i Shtetit (DASH), shkruan se Shqipëria ka përmbushur kushtet minimale në lidhje me transparencën fiskale për vitin 2021.
Sipas raportit, Shqipëria rendit në mes të 74 vendeve që kanë plotësuar këto kërkesa minimale, me shtete si Afganistani, Armenia, Bosnje Hercegovinë, etj.
Departamenti ka shqyrtuar kërkesat minimale të transparencës fiskale në konsultim me agjencitë e tjera përkatëse federale dhe i ka azhurnuar ato kërkesa.
Gjatë këtij procesi, Departamenti vlerësoi transparencën fiskale të qeverive gjatë periudhës nga 1 janar – 31 dhjetor 2020. Departamenti shqyrtoi informacionin nga ambasadat dhe konsullatat amerikane, agjencitë e tjera qeveritare të SH.B.A., organizatat ndërkombëtare dhe organizatat e shoqërisë civile.
Misionet diplomatike amerikane u konsultuan me zyrtarë të qeverisë së huaj, organizata ndërkombëtare dhe organizata të shoqërisë civile për të marrë informacion për këto vlerësime.
“Transparenca fiskale informon qytetarët se si shpenzohen të ardhurat e qeverisë dhe të ardhurat nga taksat. Ky është një element kritik i menaxhimit efektiv të financave publike. Transparenca u siguron qytetarëve një dritare në buxhetet qeveritare dhe ndihmon që qeveritë të japin llogari. Ndihmon në ndërtimin e besimit dhe qëndrueshmërisë së tregut. Raporti i Transparencës Fiskale i mandatuar nga Kongresi është një mjet për të identifikuar mangësitë dhe për të mbështetur ndryshimet e nevojshme.”, thuhet ndër të tjera në raport.
