Aktori i njohur i ‘Portokallisë’, Aleks Seitaj, si rrallë herë ka folur për fëmijërinë e tij. I ftuar në rubrikën “Dream Team” në emisionin “E Diell” , ai u shpreh se në fëmijërinë e tij ka qenë një fëmijë i vetmuar dhe se nuk kishte lodra. Varfëria ka shenjuar në fëmijërinë e tij, ku nuk nguron të ndajë me publikun ato çaste të pakta që argëtohej.
“Mbaj mend që në fëmijërinë time kam qenë një fëmijë i vetmuar dhe kisha një shall. Nuk kisha lodra se ishim të varfër dhe atë shallin unë e përdorja si makinë, si tapet fluturues dhe që nga ajo kohë vetëm me atë shallin që na gjendej dhe kam përshtypjen që na u zhvillua imagjinata. Dhe është nga gjërat që influencoi në profesionin që unë kam sot. E kam atë shallin se ishte shalli i mamasë time, sepse janë disa gjëra të pajës së mamasë përfshirë dhe robdishani që kam në sketche që janë për muze. Pavarësisht se babin e dua shumë, më duhet të them se luaja me mamin, zakonisht bënim lojëra ‘mos u nxeh’, por mbaj mend që kemi parë shumë filma me mamanë”, tha Aleksi.
