Në Aeroportin Ndërkombëtar të Shkupit, kanë arritur kufomat e viktimave të aksidentit tragjik në Bullgari. Avionët ushtarakë janë ulur në aeroportin e Shkupit, ku po priteshin nga familjarët e viktimave dhe nga zyrtarë të lartë. Për 45 viktimat që humbën jetën në aksidentin tragjik në Bullgari, teksa po ktheheshin nga Turqia, do të ketë një ceremoni shtetërore.
Trupat e pajetë do t’u dërgohen fillimisht në banesa familjarëve, e më pas do të përcillen për në banesën e fundit. Homazhet në nder të tyre do të mbahen në sheshin ‘Skënderbej’ nga ora 10:00 deri në orën 13:00.
Të pranishëm në Aeroportin e Shkupit ishin një delegacion i lartë shtetëror i Maqedonisë së Veriut, e po ashtu edhe kryeparlamentarja Lindita Nikolli, Ministri i Mbrojtjes Niko Peleshi dhe Presidentja e Kosovës, Vjosa Osmani.
Aksidenti tragjik ndodhi në 23 nëntor, ku si pasojë e flakëve humbën jetën 45 shqiptarë nga Maqedonia e Veriut dhe 7 të tjerë u plagosën. Mes viktimave ishin edhe 12 fëmijë. Për shkak të ngjarjes së rëndë, Kosova shpalli 24 nëntorin ditë zie, ndërsa Maqedonia e Veriut shpalli tre ditë zie në nder të viktimave që humbën jetën në aksident.
