Protesta e artistëve para Teatrit Kombëtar ka përfunduar me një person të plagosur, ku pasi ka humbur ndjenjat, ka përfunduar në pishinën boshe të Teatrit.
Situata ka agravuar pasi artistët dhe përfaqësuesit e shoqërisë civile, pas konfrontimit me forcat e rendit, kanë arritur të futen në ambientet e brendshme të Teatrit Kombëtar, duke kaluar nga një dritare në pjesën anësore të godinës.
Artistët pasi u futën në ambientet e Teatrit, kanë hapur portën kryesore, ç’ka mundësoi dhe hyrjen brenda të pjesës tjetër të protestuesve.
Një qytetar, identiteti i të cilit ende nuk bëhet me dije, ka mbetur i lënduar në tentativën për t’u futur në ambientet e Teatrit.
Ai ka humbur ndjenjat, dhe është rrëzuar në pishinën boshe që është midis dy godinave. Sikundër duket nga pamjet, pranë qytetarit janë mbledhur njerëzit të cilët asistojnë në dhënien e ndihmës së parë. Qytetari ka marrë ndihmën e parë nga ana e protestuesve, ndërkohë që ka qëndruar i pa lëvizur deri në mbërritjen e ambulancës.
Pak më herët, në mbështetje të artistëve ishte edhe kryedemokrati Lulzim Basha, bashkë me ish-deputetë të PD. Basha u shpreh se qeveria po pastron paratë e drogës me Teatrin Kombëtar.
Ai tha se PD do vijojë të mbështesë aksionin e Aleancës për Teatrin, për të mbrojtur godinën.
Plas para Teatrit/ Basha: Hajdutët po na shkatërrojnë, Ramës do i japim goditjen finale!
Një reagim u përcoll edhe nga ana e presidentit Meta, i cili e cilësoi si të turpshëm rrethimin e godinës së Teatrit nga forcat e policisë, dhe përplasjen fizike mes tyre dhe komunitetit të artistëve.
Në një postim në llogarinë e tij zyrtare në “Facebook”, Meta shkruan se kjo është një ngjarje e shëmtuar dhe e turpshme, duke i bërë thirrje policisë që të respektojë artistët, dhe të mos ushtrojnë dhunë fizike ndaj tyre.
Protesta për Teatrin/ Meta: Shumë turp, mos dhunoni artistët!
