A ju pëlqen një film i mirë horror që ju bën t`ju vlojë gjaku ndër vena? Ndoshta ju jeni më shumë një “përgatitës për fundin e botës” që e imagjinon jetën në një apokalips të dominuar nga zombit.
Çfarëdo qofshin shumëllojshmëria e gjërave të frikshme që ngjallin interesin tuaj, një studim i ri zbulon se ato mund të jenë duke ju ndihmuar jo pak në qëndrueshmërinë tuaj mendore. Studiuesit thonë se adhuruesit e filmave horror dhe filmave të tjerë post-apokaliptikë, po e përballojnë më mirë se të tjerët frikën e jetës reale të shkaktuar nga pandemia e koronavirusit.
Një ekip në Shtetet e Bashkuara dhe Danimarkë, ka zbuluar se adhuruesit e filmave plot adrenalinë dhe frikë po përjetojnë më pak shqetësime psikologjike për shkak të Covid-19. Përveç filmave horror, filmat që i përkasin zhanrit apokaliptik, po i ndihmojnë gjithashtu njerëzit të përgatiten mendërisht për ngjarjet e papritura që po hasin çdo ditë.
Këto zhanre përfshijnë pushtimet nga alienët, skenarë apokaliptikë dhe post-apokaliptikë dhe filma me zombi. “Edhe pse shumica e njerëzve i ndjekin filmat horror me qëllimin kryesor për t’u argëtuar më shumë sesa për të mësuar diçka, historitë e frikshme paraqesin mundësi të shumta për të mësuar”- shkruajnë autorët e studimit në revistën “Personality and Individual Differences”.
“Filma të tillë, i japin mundësi audiencës të eksplorojë me shumë pak kosto, një version të imagjinuar të botës. Përmes trillimit, njerëzit mund të mësojnë si të shpëtojnë nga grabitqarët e rrezikshëm, si t’ia dalin në situata të reja shoqërore, dhe si të praktikojnë aftësitë e tyre të leximit të mendjes dhe rregullimit të emocioneve”.
Covid-19, po i shndërron filmat horror në një mjet mësimor
Studimi në fjalë përfshiu 310 pjesëmarrës, të cilët u pyetën mbi preferencat e tyre ndaj filmave, duke shqyrtuar se çfarë filmi horror preferojnë. Më pas studiuesit u bënë secilit 13 pyetje, për të parë gjendjen emocionale të grupit gjatë pandemisë.
Përveç faktit që këto lloj filmash u japin mundësi njerëzve t’i trajtojnë shqetësimet në një mjedis të sigurt, autorët e studimit besojnë se këta filma u japin gjithashtu njerëzve këshilla se si duhet të përballen me krizat e tyre personale.
“Një arsye pse përdorimi i tmerrit mund të ndërlidhet, me më pak shqetësime psikologjike është se trillimi i tmerrit u jep mundësi audiencave të praktikojë luftën me emocionet negative në kushtet e një mjedisi të sigurt”- sugjerojnë studiuesit.
Nga ana tjetër përjetimi i emocioneve negative në një mjedis të sigurt, sikurse ndodh gjatë një filmi horror, mund t’i ndihmojë individët të ndërtojnë strategji për t’u përballur me frikën, dhe për të adresuar qetësi me situatat që shkaktojnë frikë në jetën reale, theksojnë studiuesit.
Kurioziteti për gjërat e frikshme
Pjesëmarrësit morën gjithashtu pjesë në një pyetësor me 24 tema të ndryshme, që vlerëson tek ata Shkallën e Kuriozitetit mbi Gjërat e Frikshme. Testi vlerëson se sa dikush është i interesuar për “tema të pakëndshme”, të tilla si vdekja apo shikimi i ekzekutimeve në kohën mesjetare.
Studiuesit zbuluan se sa më shumë kuriozitet ka një njeri për gjëra të pazakonta, aq më shumë ai është në gjendje të shohë anën pozitive të gjërave edhe gjatë kohës së karantinës. Këta të anketuar kanë më shumë të ngjarë që ndërsa jetojnë të mbyllur në shtëpi për shkak të masave bllokuese të shohin një film me temë pandemitë.
Autori kryesor i studimit Koltan Skrivner nga Universiteti i Çikagos, SHBA, shpjegon se njerëzit që kanë kuriozitet për gjërat e frikshme, nuk janë duke e “shijuar” domosdoshmërisht pandeminë globale. Ai shton se këta individë, ndryshe nga të tjerët, arrijnë të gjejnë një aspekt interesant të krizës ku ta fokusojnë më pas vëmendjen e tyre.
Përshtatur nga TIRANA TODAY
