Ish-drejtoresha e Prokurimeve Publike, Edlira Naqellari, do të vijojë të qëndrojë në qeli. Ajo përfundoi pas hekurave, pas zbulimit të tenderit abuziv me uniformat e policisë. GJKKO la sot në fuqi masën “arrest me burg” ndaj. Edlira Naqellari kishte kërkuar zbutje të masës së sigurisë, por kjo kërkesë u refuzua.
Naqellari u arrestua bashkë me zyrtarë të tjerë, të cilët në bashkëpunim me njëri-tjetrin akuzohen se kanë abuzuar me dhënien e tenderit të uniformave të policisë. Këto arrestime janë bërë në lidhje me tenderin abuziv të 11 majit 2020, në lidhje me uniformat e policisë me vlerë 2.8 miliardë lekë, të akuzuar për shkelje të barazisë në tendera.
Në dëshminë e saj në Gjykatë, Naqellari këmbëngul se është e pafajshme dhe se nuk ka bërë asnjë shkelje, ndërsa thekson se ende nuk ka të qartë se cilin ligj ka shkelur. Sipas Naqellarit, Policia e Shtetit mbahej prej vitesh me donacione nga shtete të ndryshme, dhe për këtë arsye ishte rënë dakord që më në fund, efektivët e Policisë së Shtetit që të visheshin me uniforma dinjitoze.
