Gjatë protestës së 8 të opozitës, presidenti Ilir Meta deklaroi shfuqizimin e dekretit që përcaktonte datën 30 qershor si ditën e zgjedhjeve vendore. Ai e arsyetoi këtë vendim si një pasojë e pashmangshme e sjelljes së të dyja palëve. Pasi Presidenti lajmëroi anulimin e dekretit për zgjedhjet e 30 qershorit, Kryeministri Rama dhe mazhoranca nxituan të deklaronin se zgjedhjet do të bëhen në 30 qershor. Madje disa analistë u shprehën se mazhoranca duhet të shkarkojë Presidentin. Por çfarë parashikon Kushtetuta për shkarkimin e Presidentit të Republikës?
Neni 90 i Kushtetutës parashikon rastin kur shkarkohet Presidenti. “Presidenti i Republikës mund të shkarkohet për shkelje të rëndë të Kushtetutës, dhe për kryerjen e një krimi të rëndë. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit, dhe duhet të mbështetet nga jo më pak se dy të tretat e të gjithë anëtarëve të tij. Vendimi i Kuvendit i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra”, thuhet në nenin 90 të Kushtetutës.
Pra edhe nëse mazhoranca vendos të shkarkojë Presidentin, është Gjykata Kushtetuese që e legjitimon vendimin, por sot ky institucion është jashtë funksionit, pasi nuk ka anëtarët e mjaftueshëm për të zhvilluar mbledhjet.
Kryeministri Rama doli dje kundër presidentit Ilir Meta për shtyrjen e zgjedhjeve vendore. Presidenti shfuqizoi dekretin për mbajtjen e zgjedhjeve në 30 qershor, por mazhoranca duket se nuk ka ndërmend ta zbatojë këtë vendim të tijin.
Gjatë një takimi me banorët e Beratit, në kuadër të fushatës zgjedhore, kryeministri Rama u shpreh se zgjedhjet janë të qytetarëve dhe jo të presidentit. Sipas tij, ky është një plan i hartuar më parë, duke theksuar se qëllimi i presidentit është të marrë të marrë zvarrë qeverinë dhe të pengoj reformën në drejtësi.
“E prisja edhe këtë, dhe nuk është asgjë tjetër veçse mbyllja e një rrethi të një plani të bërë me kohë për një arsye, për arsyen se nuk kërkohet shtyrja e zgjedhjeve, kërkohet marrja zvarrë e kësaj qeverie dhe varrosja e reformës në drejtësi. Ne në 30 qershor do bëjmë zgjedhje.
Zgjedhjet nuk janë të partive, as të presidentit, por të popullit shqiptar. Këto janë sjellje të një grupi të dëshpëruar, dhe janë të detyruar të humbin në mënyrë të dëshpëruar. Dhe kjo që sapo ndodhi, është vazhdimi i asaj që ka ndodhur edhe me atë dosjen e famshme që i rrokullisën kokat të gjithë shqiptarëve, duke u përpjekur të krijojnë një mjegull, dhe të hedhin të gjithë baltën e mundshme për të shkuar drejt shkatërrimit të zgjedhjeve dhe marrjes peng të gjithë procesit demokratik”, deklaroi ai.
Rama e ka kërcënuar hapur presidentin, duke thënë se ai është gjithmonë tre hapa para, dhe nuk e zënë asnjëherë në befasi. “Ne jemi gati, i kemi marrë të gjitha masat. Gabojnë gjithmonë shumë me këto që bëjnë, sepse unë jam gjithmonë tre lëvizje përpara. Asnjëherë deri më sot nuk më kanë surprizuar, dhe s’më kanë kapur në befasi, do çuditen më shumë se si ka për t’u ndodhur”, tha Rama.
