Pasja e fëmijëve të vegjël në shtëpi, mund të ulë rrezikun e shtrimit në spital me simptoma të rënda të Covid-19, sipas një studimi të ri të punonjësve të Shërbimit Shëndetësor Kombëtar në Skoci. Fëmijët preken shpesh marrin nga kolla dhe e ftohura, dhe kjo përfshin koronaviruset sezonalë që shkaktojnë të ftohurën e zakonshme.
Duke qenë të së njëjtës familje virusesh, shumë ekspertë kanë hipotetizuar se reagimi imun ndaj këtyre koronavirusëve, mund të sigurojë një farë mbrojtje nga Covid-19. Megjithatë studimet e mëparshme, kanë treguar se përgjigja imune ndaj koronavirusëve sezonalë nuk zgjat shumë, dhe se ri-infeksionet janë mëse të zakonshme .
Studimi i fundit, që nuk është rishikuar ende nga kolegët e tyre, zbuloi se të rriturit që kanë në familjen e tyre fëmijë të vegjël (të moshës deri në 11 vjeç), kishin një rrezik pak më të ulet të prekjes nga SARS-CoV-2 (koronavirusi që shkakton Covid-19), dhe një rrezik më të vogël të shtrimit në spital.
Por të rriturit që kanë në shtëpi fëmijë të moshës 12 vjeç e sipër, nuk kishin asnjë ulje të rrezikut, krahasuar me të rriturit që jetonin pa fëmijë. Është e rëndësishme të theksohet se fëmijët mund të infektohen me Covid-19, dhe ata që shfaqin simptoma janë po aq infektues sa të rriturit.
Dhe cilido që shqetësohet se fëmija i tyre është potencialisht infektues, duhet të ndjekë udhëzimet e autoriteteve shëndetësore. Por në këtë studim ka disa konsiderata të rëndësishme, që sugjerojnë se këto gjetje duhet të trajtohen me kujdes.
Disa nga kufizimet janë theksuar nga vetë autorët, siç është fakti që të rriturit pa fëmijë ishin mesatarisht më të rritur, dhe kishin më shumë të ngjarë të kishin probleme shëndetësore ekzistuese, kur krahasoheshin me ato që kishin një familje me fëmijë.
Është diçka e mirë-vërtetuar, se mosha dhe sëmundjet e tjera, si diabeti dhe sëmundjet e veshkave, mund të jenë një faktor i madh në sëmurjen rëndë të një personi me Covid-19. Autorët e studimit e pranojnë këtë fakt. Dhe kur merren parasysh këta faktorë në modelin e tyre statistikor, efekti i rrezikut të zvogëluar nga pasja e fëmijëve të vegjël në shtëpi, zvogëlohej.
Edhe pse rreziku ishte ende pak më i ulët se ai i të rriturve që jetonin pa fëmijë. Faktorë të tjerë që duhet të merren parasysh, përfshijnë faktin se të rriturit me fëmijë, kanë më shumë të ngjarë të punojnë me kohë të pjesshme apo me orë të reduktuara, për shkak të kujdesit të tyre për fëmijët, dhe kjo mund të kufizojë ekspozimin e tyre ndaj Covid-19.
Megjithëse autorët e morën parasysh këtë gjatë kryerjes së analizës së tyre, ata pranojnë se nuk kishin të dhëna të sakta për orët e punës nga grupi i vullnetarëve gjatë periudhës së studimit. Autorët thonë se nëse ekspozimi ndaj viruseve që shkaktojnë të ftohurën, është një mekanizëm i rëndësishëm për mbrojtjen, ofruesit e kujdesit shëndetësor për fëmijët dhe mësuesit mund të përfitojnë nga ky ekspozim.
Sidoqoftë, para se ky studim të merret si një provë për të justifikuar mbajtjen hapur të shkollave, duhet të theksohet se një kufizim i madh është periudha në të cilën u mblodhën të dhënat. Të dhënat e infeksioneve me Covid-19, dhe shtrimet në spital të përfshira për këtë studim, u mblodhën midis 1 marsit dhe 7 korrikut 2020, një kohë gjatë së cilës shkollat ishin kryesisht të mbyllura.
Ndonëse shumë shkolla ishin ende të hapura për fëmijët e punëtorëve në sektorët thelbësorë të ekonomisë gjatë mbylljes së Britanisë së Madhe, të dhënat për ta reflektuar këtë nuk ishin të disponueshme për këtë studim. Ndaj, është e pamundur të dihet se sa familje të përfshira në këtë studim kishin fëmijë që vijonin rregullisht shkollën, apo që ishin të izoluar në shtëpi, gjë që do të ndikonte në ekspozimin e mundshëm të familjeve ndaj Covid-19.
Së fundmi, siç e theksuan me të drejtë autorët në përfundimin e tyre, pavarësisht gjetjes së një lidhjeje midis fëmijëve të vegjël në një shtëpi, dhe një rreziku dukshëm më të vogël për t’u prekur nga SARS-CoV-2, nuk ka asnjë mekanizëm të provuar se përse po ndodh kjo.
Shumë ekspertë supozojnë se ata që janë të ekspozuar ndaj koronavirusëve sezonalë, mund të kenë një farë niveli të imunitar kundër COVID-19, përmes një dukurie të quajtur “mbrojtja e tërthortë”, por kjo gjë mbetet për t’u provuar . Është gjithnjë e rëndësishme të mos harroni se korrelacion nuk do të thotë shkak, apo siç e thanë autorët, “lidhja e anasjelltë që vërehet, mund të jetë një gjetje rastësore”.
Do të jetë interesante të shihet nëse një studim i mëtejshëm, do të risjellë të njëjtin konstatim në popullata të tjera, dhe nëse përcaktohet shkaku i këtij rreziku të perceptuar të infeksionit. Derisa të gjendet kjo lidhje, ky studim duhet të merret me një fare rezerve.
Burimi i lajmit: https://theconversation.com/can-children-really-stop-you-catching-a-bad-case-of-covid-19-147303
Përshtatur nga Tirana Today
