A mund të sjellë protesta rritje të rasteve me COVID-19?
Kjo pyetje po shtrohet nga shumë njerëz aktualisht në Shqipëri.
Dy protesta janë mbajtur deri tani në Tiranë, ndërsa një tjetër është lajmëruar ditën e sotme në orën 17:30 nga Aleanca për Mbrojtjen e Teatrit, të cilës pritet t’i bashkohet edhe opozita.
Ndërkohë lidhur me pyetjen e mësipërme është përgjigjur në “A2” epidemiologu Ilir Alimehmeti:
“Grumbullimet masive kanë një rrezik në vetvete, por protestat ndodhën në 17 maj, ditën e diel, ndërsa të hënën patën një hapje pothuajse të krejt shoqërisë, puna, shkollat, baret, restorantet. Kjo do të thotë se nëse do të kemi rritje të rasteve, ne nuk e ndajmë dot.
Duhet të kemi parasysh që për një person që ka qenë në protestë, kanë qenë me dhjetëra apo qindra ata që kanë qenë në bare apo kafe. Nuk mund ta ndajmë dot nëse kjo ndodhi nga hapja e masave apo nga protestat.
E vetmja mënyrë që ne mund ta lidhim është nëse rastet do të shtohen në radhët e policisë. Ata janë të vetmit jo të pranishëm në bare, restorante apo shkolla, por më shumë në protestë”.
