Deputeti i PS-së, njëherësh dhe Kryetari i Komisionit të Ligjeve, Ulsi Manja, teksa e quajti antikushtetues vendimin e presidentit Meta për shtyrjen e datës së zgjedhjeve vendore, shprehet se ky vendim mbetet juridikisht i pazbatueshëm.
Sipas tij, zgjedhjet do të vazhdojnë të zhvillohen më 30 qershor, ndërsa shtoi se Meta i ka dhënë vetes kompetencat e një presidenti të zgjedhur nga populli, ndërkohë që në nenin 1 të Kushtetutës, Shqipëria përcaktohet si Republikë Parlamentare.
Po ashtu, i pyetur nëse Meta është në gjendje që të shpërbëjë Parlamentin, Manja u shpreh se tashmë nga ai mund të pritet gjithçka, pasi po vepron duke mbajtur qëndrim të njëanshëm.
Mirëpo, edhe nëse Meta merr këtë vendim, deputeti thekson se Kuvendi do të vijojë normalisht punën.
“Me këtë veprim që Meta bërë zhdekretoi vetveten. Në këtë logjikë që nuk është kushtetuese, Presidenti mund të bëjë gjithçka. Ai ka marrë anë dhe mund të bëjë çdo gjë.
Fatmirësisht kushtetutë-bërësit janë kujdesur që në Nenin 1 që ta cilësojnë Shqipërinë si Republikë Parlamentare. Kushtetua ka parashikuar vetëm dy raste ku mund të shpërbëhet Parlamenti: Kur nuk zgjidhet Presidenti dhe kur nuk formohet dot qeveria. Por nëse Presidenti del jashtë kontureve Kushtetuae, mund të ndërmarrë çdo lloj akti”, deklaroi Manja.
