I pyetur drejtpërdrejt nga drejtuesi i emisionit “Opinion” Blendi Fevziu, nëse ka një marrëveshje të fshehtë mes Edi Ramës dhe Lulzim Bashës pas paktit për reformën zgjedhore, Sali Berisha u përgjigj se nuk ka asnjë marrëveshje.
“Ju garantoj, në dijeninë time në mënyrë absolute asnjë marrëveshje! Ju garantoj që jo, në vlerësimin tim dhe në dijeninë tim”, tha ish-kryeministri Berisha.
Por analisti dhe gazetari Lorenc Vangjeli e pyeti ish-kryeministrin se a kishte dijeni për një takim mes Edi Ramës dhe Lulzim Bashës në një vend të BE-së.
Lorenc Vangjeli: Një pyetje konkrete doktor. A keni dijeni ju që Basha dhe Rama janë takuar këtë janar në një shtet mik i Shqipërisë, domethënë jashtë Shqipërisë. Një takim i cili mund të shënojë 6-vjetorin e një marrëdhënie të tyre të veçantë me ulje me ngritje, dashuri dhe urrejtje. Nga shtatori i 2014, po iu flas për janarin e 2020. Në dijeni tuaj dhe pas shpinës tuaj.
Sali Berisha: Lorenc e di ku e kam fjalën unë. Keqardhja ime është se bie viktimë e zyrës Fuga. Me të gënjy Fuga ty. Kupton apo jo? Ti mund ta gënjesh 100 herë, po jo ai ty. Të garantoj që jo.
Lorenc Vangjeli: Po sikur nesër ta shikoni në një foto Bashën duke buzëqeshur pas Ramës me të njëjtën buzëqeshjen që ka pasur Trumpin.
Sali Berisha: Nxjerre!
Lorenc Vangjeli: Supozojmë thash…
Sali Berisha: Të viktimizojë Fuga është me të shku njeriu kot.
