Pas dështimit të hapjes së negociatave për Shqipërinë dhe Maqedoninë e Veriut, Rama ka deklaruar se nuk do t’i kërkonte në asnjë moment mocion besimi parlamentit shqiptar, për t’i hapur rrugë largimit apo konfirmimit të tij në qeveri.
Në daljen e tij publike, Rama tha se këtë mocion mund t’ia kërkonte parlamentit të Francës. Kryeministri i vendit theksoi edhe faktin se prej 14 vitesh Maqedonia e Veriut ka qenë shumë afër marrjes së negociatave dhe pavarësisht se ndryshoi emrin, sot mori një “JO”.
“Mund t’ia kërkoj parlamentit Francës, por parlamentit shqiptar s’mund t’ia kërkoj dot. Skam çfarë i kërkoj parlamentit tonë. Parlamentit francez nuk ia kërkoj dot. Maqedonia ka 14 vjet që pret çeljen e negociatave. Nga Këshilli në Këshill, dhe s’merr po. E detyruan të ndërrojë emrin. Identitetin, duke i premtuar që; u bë kjo dhe ja ku jemi. E kemi rrezikuar në maj-qershor për shkak të katrahurave që u bë këtu. S’ka qenë opsion dhe s’ka lidhje vendimmarrja apo mosvendimmarrja me çfarë ka bërë tjetri. Ata ndërruan emrin dhe përfytyroni që të ndërrosh emrin e vendit dhje mos të marrësh ‘PO’ Atëherë çfarë duhet të bëjnë më shumë ata? Asgjë. Por u gjendën në një moment të historisë brenda BE ku ndodh një përplasje konceptuale mes Francës dhe Gjermanisë. Nuk është thjesht për zgjerimin,. Por edhe për elementë të tjerë. Mekanizmi është i tillë që mjafton njëri të thotë ‘Jo’ dhe është ‘JO’”, deklaroi kreu i qeverisë.
