Teksa po fliste me shifra se çmimi i energjisë për konsumatorin familjar ka rënë, kryeministri Rama ka hedhur batutën e radhës se Basha mund të bëjë më shumë. Rama tha shkurt dhe prerë se nuk do të ketë ulje të çmimit të energjisë elektrike. Sipas tij, një premtim të tillë mund ta bëjë vetëm Lulzim Basha, që sipas kreut të qeverisë, nuk ka dhe nuk ka për të pasur gjë në dorë, duke nënkuptuar se do të humbë në 25 prill.
“Çmimin e energjisë mund ta ulë Lulzim Basha, që nuk ka gjë në dorë dhe nuk do të ketë gjë në dorë. Çdo me thënë ulje e mëtejshme? Jo, të gjitha premtimet mund të mbahen në kohën që ti parashikon, ndodh diçka dhe shtyhet në kohë. Premtimet mund të marrin kohë përtej asaj që ti parashikon.
Por të gjitha premtimet që ne kemi bërë dhe bëjmë, janë të bazuara në arsyetim të mundësive që kemi. Ndërkohë që ulja e çmimit të energjisë është një premtim që nuk e bëjmë dot.
Këtë mund ta bëjë Lulzimi që nuk ka gjë në dorë dhe nuk ka për të pasur dhe thotë kap çfarë të kapësh dhe premton nënë e babë”, tha ai.
