Pasi Kreu i Shtetit Ilir Meta shfuqizoi dekretin e zgjedhjeve, pikëpyetjet janë të mëdha lidhur me atë se çfarë do të ndodhë me situatën politike në vend.
Aludimet ekzistojnë që Meta të shkarkohet ditën e nesërme, mirëpo gjithçka mbetet për t’u parë pasi ende nuk dihet me saktësi se çfarë do të ndodhë.
Deputetja e PS-së Mirela Kumbaro ka hedhur pakëz dritë mbi këtë ‘çështje të nxehtë’ duke deklaruar publikisht për “RTV Ora” se ditën e nesërme presidenti nuk do të shkarkohet: “Nesër nuk ndodh shkarkimi i askujt, nesër propozohet një draft rezolutë, e cila në fakt përmban tema dhe pika të rëndësishme që do të ngjallin edhe për çka do të bëhet debati. Do të jetë një debat intensiv dhe pastaj gjithë proceset e tjera do të ndjekin logjikën e tyre”.
Thuhet se Partia Socialiste ka nisur mbledhjen e firmave për kërkesën për shkarkimin e Presidentit, ndërkohë lidhur me këtë gazetarja e ka pyetur deputeten: “Ka një lloj tërheqje apo kjo procedurë do të vazhdojë?”
“Jo nuk ka tërheqje, ka një proces. Edhe sikur të ishim në një situatë hipotetike apo edhe letrare po të doni, shkarkimi i postit të presidentit nuk ndodh në një ditë. Janë procedura të parashikuara nga rregulloret e Kuvendit dhe Kushtetuta dhe do të ndiqen ato hapa. Ajo që ndodh nesër është debati parlamentar që do të ketë si bosht kryesor gjithë platformën e parashikuar nga draft rezoluta”, është shprehur Kumbaro.
