Ish-deputetja e Partisë Socialiste, Arta Dade, duket se nuk ka pritshmëri nga kryeministri Rama dhe PS, ndërsa është shprehur mjaft e prerë se nuk mund të marrin mandatin e tretë.
E ftuar në “Dita jonë” në A2, ajo deklaroi se reformat e qeverisë duhen vlerësuar, por më thelbësorja mbetet fakti nëse po japin efektet e duhura.
Për të, sipas asaj çfarë pasqyrohet, më shumë po shkohet drejt pjesës për të bërë show, sesa për të qënë më konkretë. Dade është e pakënaqur jo vetëm me Ramën, por edhe me opozitën, duke humbur shpresat për një ndryshim rrënjësor.
“Reformat duhen vlerësuar, por problemi është a po çohen deri në fund dhe a po japin efektet e duhura?
Fatkeqësisht, më duket sikur rreket më shumë për të bërë “show”. Njerëzit po largohen dhe po largohet klasa e mesme fatkeqësisht.
Gjermania po kërkon fuqi punëtore, dhe janë shtete që mendojnë në kuadër afatgjatë, ndërsa ne nuk kemi shqetësim se vendi po braktiset.
Shpresën nuk mund ta kthejë më Rama, dhe as kjo opozitë që është në gjendjen më dramatike që ka qenë ndonjëherë një opozitë në vend, dhe i ka lënë terren të lirë qeverisë”, u shpreh Dade.
Teksa është pyetur nëse kryeministri Edi Rama do ta fitojë një mandat të tretë, Dade u përgjigj shkurt: “Nuk besoj dhe nuk duhet që ta fitojë”.
