Meta ka deklaruar se Monika Kryemadhi është prerë në besë nga ish-kryedemokrati, Lulzim Basha për djegien e mandateve. Kryetari i Partisë së Lirisë, Ilir Meta, tha në emisionin “Now” në Euronews Albania, se Basha i dogji mandatet, pasi këtë gjë bëri Kryemadhi. Por sipas tij, ky ishte plani i Bashës me Ramën. Meta tha qartazi se Lulzim Basha i dogji mandatet vetëm pasi i dogji LSI-ja, ku është i mendimit se kjo ishte loja me Edi Ramën. Duke qëndruar në të njëjtën linjë, Meta shtoi se LSI-ja do kthehej në faktor kryesor opozitar, duke u kthyer kësisoj edhe në tmerrin e Ramës.
“Unë me Berishën kam folur një vit para se të digjeshin mandatet, me Bashën kam folur dhe nuk më ka shkuar mendja. Në dhjetor kam kthyer me pahir LSI-në në Parlament. Ata shfrytëzuan momentin kur unë isha jashtë. Do digjte mandatin e saj për arsyen e vetë emocionale Monika Kryemadhi.
Asnjë tjetër nga LSI-ja nuk do digjte mandat dhe Partia Demokratike nuk do t’i digjte mandatet. Lulzim Basha i dogji mandatet vetëm pasi i dogji LSI-ja, sepse kjo ishte loja me Edi Ramën. LSI-ja do kthehej në faktor kryesor opozitar, që do të ishte tmerri i Edi Ramës, për arsye se nuk e kontrollonte. Atë e prenë në besë”, theksoi ai.
