Presidenti Ilir Meta, në një konferencë me mediat, ka ngritur shqetësimin për largimin e të rinjve nga Shqipëria, për shkak te asaj qe ai e quajti “krizë në arsim” si një dramë kombëtare.
Për Metën, nuk ka rëndësi se kujt forcë politike do t’i përkasë pasi të lërë mandatin e Kreut të Shtetit. Ai u shpreh se ajo që ka rëndësi është shpopullimi i Shqipërisë, pasi të rinjtë që studiojnë jashtë nuk duan të kthehen, dhe ata që janë kërkojnë të largohen.
“Kjo është e parëndësishme për momentin, dhe do të ketë rëndësinë e saj në momentin e duhur. Tema për të cilën folëm është alarmuese, që reflektohet edhe në të dhëna të tjera. Sipas studimeve, 94% e shqiptarëve që studiojnë jashtë, nuk pranojnë të kthehen dhe ata që studiojnë këtu duan të largohen. E rëndësishëm është të përfshihemi në një debat konstruktiv për arsimin në vendin tonë, pasi nuk mund të ketë një të ardhme me këto tregues. Unë mendoj se vendi ka kapacitete intelektuale, por politika duhet të jetë mirëkuptuese dhe ti japë fund tutelës. Duhet ti japë mundësi të rinjve, për vende më të mira pune”.
Presidenti Ilir Meta ka komentuar deklaratat e Lulzim Bashës dhe kryeministrit Edi Rama se SPAK duhet të hetojë Sali Berishën, pas shpalljes “non grata” nga SHBA-ja.
“Nuk kam dëshirë të merrem me çështje të cilat unë i konsideroj banale, dhe që tregojnë një raport shumë të vjetër mes politikës dhe drejtësisë, aq më tepër kur vijnë nga ajo lloj politikë që do sillte drejtësinë e re. Çdo politikan, kur ka fakte, akte e vepra konkrete të shpërdorimit të detyrës, të krimit, i çon te institucionet e drejtësisë.
Përpjekja për t’i dhënë udhëzime nga Kongresi i partisë institucioneve të drejtësisë, se deri ku e kanë kufirin për të hetuar dhe si duhet të bëjnë drejtësi me regji, janë përpjekje për të shmangur përgjegjësinë nga kapja e shtetit nga një korrupsion kaq të rëndë. Është detyra e institucioneve të drejtësisë të tregojnë integritetin dhe besueshmërinë e tyre”, tha Meta.
