Drejtoria e Përgjithshme e Burgjeve ka vendosur që ish-ministri i Brendshëm Saimir Tahiri, ta kryejë dënimin në IEVP Fier. Sakaq pritet transferimi i ish-Ministrit Tahiri, nga burgu 313 në Tiranë drejt burgut të Fierit. Ish-ministri i Brendshëm është dënuar me 3 vjet e 4 muaj burg.
GJKKO e dënoi Saimir Tahirin me 5 vite burg për “Shpërdorim të detyrës”. Por me gjykim të shkurtuar dënimi iu ul në 3 vite e 4 muaj burg. Tahiri u dënua vetëm për “Shpërdorim detyre” duke i ‘shpëtuar’ akuzave “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
Për avokatin e Saimir Tahirit, ka dyshime se vendimi i Apelit të GJKKO, që dënoi atë me 3 vite e 4 muaj burg, ishte i marrë që para se të shpallej nga trupa gjykuese. “Gjykata e Apelit, me gjyqtarë të rretheve, vendosi njësoj si shkalla e parë, por çuditërisht ka dalë jashtë logjikës juridike dhe hoqi pezullimin, duke thënë që duhet të shkojë në burg.
E çuditshme ishte që në kundërshtim me praktikën, sa jepet vendimi i Apelit, sa zbardhet, për Tahirin çdo gjë ishte e organizuar më parë dhe u bë ekzekutimi i menjëhershëm. Unë duke ditur në detaje dosjen, isha i bindur se do jepej pafajësia. Gjykata nuk tha konkretisht çfarë shkelje bëri gjatë ushtrimit të detyrës dhe cila është pasoja. Nuk ka shpërdorim, sepse ministri është funksion politik”, tha ai.
