Dje, kryeministri Rama ka mbledhur në 100 ditëshin e mandatit të tretë qeverisës ministrat e kabinetit “Rama 3”. Takimi nisi rreth orës 09:30 dhe përfundoi në 15:30 tek “Vila 30” në ish-Bllok, dhe u zhvillua pa praninë e mediave. Gjatë 6 orëve që zgjati mbledhja, mësohet se shefi i qeverisë ka vendosur të fusë në skaner ministrat, ndërsa ka lëshuar në adresë të tyre edhe valë kritikash sa i takon punësimeve dhe dështimit me objektivat. Kryeministri Edi Rama ka futur në skaner qeverinë.
Fillimisht janë analizuar punët e bëra në 3-mujorin e parë nga gjithsecili për dikasterin që mbulon. Raportohet se kreu i qeverisë, Edi Rama, është shfaqur i pakënaqur me punën e ministrave. Sipas informacioneve, i pari i ekzekutivit është shprehur se disa ministra kanë dështuar me objektivat, sikundër janë zbutja e papunësisë dhe arritja e disa objektivave të tjera të vendosur nga ai para 3 muajsh, si rindërtimi pas tërmetit dhe menaxhimi i pandemisë, mirëqenia e qytetarëve, modernizimi për zhvillim të ekonomisë prodhuese, familja dhe forcimi i shtetit ligjor.
Ai ka dhënë paralajmërimin e fundit se nëse ministrat dështojnë sërish, në fillim të vitit tjetër kur do të ketë sërish mbledhje me këtë fokus, mund të ketë ndryshime në qeveri, gjithmonë nëse nuk arrihen objektivat e vendosur nga kryeministri Edi Rama. Përpos kësaj, kryeministri Rama iu ka komunikuar ministrave disa prioritete të tjera që duhet të përmbushin, sikundër është largimi i gjithë drejtorëve parazitë në administratë publike dhe që me sjelljet e tyre arrogante nuk iu mbarojnë punë qytetarëve, si dhe mbajtja e përgjegjësisë për këdo që është përfshirë në afera apo ka shkelur ligjin gjatë ushtrimit të detyrës.
Çështja më e debatuar është ajo e inceneratorëve, ndërkohë që mësohet se kryeministri Rama ua ka bërë të qartë ministrave se përgjegjësia është personale, dhe se kushdo le t’i dalë vetë zot në rast se e thërret SPAK-u për t’i kërkuar llogari.
