Qeveria ka marrë vendimin për shpërblimin e pensionistëve në fundvit, dhe familjeve në nevojë. Për të moshuarit do të jepen nga 5 mijë lekë të reja. Ndërkaq, për familjet me ndihmë ekonomike do të jepen 3 mijë lekë të reja.
Ministrja e Ekonomisë dhe Financave, Delina Ibrahimaj, u shpreh se edhe pensionistët do të përfitojnë bonus për fundvit. Shuma që do të jepet për shpërblimet e fundvitit për pensionistët është rreth 40 milionë dollarë.
“Janë 668 mijë pensionistë që përfitojnë nga paketa e miratuar, e cila arrin një vlerë prej 3.5 miliardë lekësh dhe 400 milionë lekë kategoritë e tjera. Janë rreth 40 milionë dollarë për pensionistët, personat me ndihmë ekonomike dhe ata me aftësi të kufizuar. Nga viti 2022, ky bonus do të bëhet pjesë e buxhetit”, tha Ibrahimaj.
Ministrja e Shëndetësisë, Ogerta Manastirliu deklaroi se qeveria ka vendosur që të ketë shpërblim për fundvit për familjet në nevojë. Ajo theksoi se janë rreth 66 mijë familje që janë përfituese të ndihmës ekonomike.
“Qeveria ka vendosur shpërblimin e fundvitit për familjet në ndihmë ekonomike, dhe janë rreth 66 mijë familje të cilat përfitojnë ndihmë ekonomike, të cilat do të përfitojnë nga paketa e solidaritetit. Gjithashtu të gjithë ata përfitues të skemës së pagesave të aftësisë së kufizuar, janë rreth 72 mijë individë”, tha ajo.
Kategoritë që do të përfitojnë
Qeveria ka bërë me dije kategoritë që do të përfitojnë shpërblim. Kështu, ata që do të përfitojnë janë: a) Personat që marrin pension pleqërie, pension invaliditeti, pension familjar dhe pension social; b) Personat që marrin pension, sipas ligjit nr.4976, datë 29.6.1972, “Për pensionet e anëtarëve të kooperativave bujqësore në Republikën Popullore të Shqipërisë”, dhe sipas paragrafit të katërt, të nenit 96, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar; c) Personat që marrin pension, sipas ligjit nr.150/2014, “Për pensionet e punonjësve që kanë punuar në miniera në nëntokë”, personat qe marrin trajtim të veçantë financiar, sipas ligjit nr.8685, datë 22.6.2000, “Për një trajtim të veçantë të punonjësve, që kanë punuar në miniera, në nëntokë”, të ndryshuar, dhe personat që përfitojnë trajtim të veçantë financiar; ç) Personat që marrin pension të parakohshëm për vjetërsi shërbimi, sipas ligjit nr.10142, datë 15.5.2009, “Për sigurimin shoqëror suplementar të ushtarakëve të Forcave të Armatosura, të punonjësve të Policisë së Shtetit, të Gardës së Republikës, të Shërbimit Informativ të Shtetit, të Policisë së Burgjeve, të Policisë së Mbrojtjes nga Zjarri dhe të Shpëtimit e të punonjësve të Shërbimit të Kontrollit të Brendshëm në Republikën e Shqipërisë”, të ndryshuar; d) Personat që nuk përfitojnë pension, por që trajtohen vetëm me shpërblimin financiar si veteranë të LANÇ-it, si dhe personat, të cilët marrin vetëm pension të posaçëm për merita të veçanta.
