Apeli i Gjykatës së Posaçme kundër Korrupsionit dhe Krimit të Organizuar (GJKKO) ka rrëzuar kërkesën e ish-drejtoreshës së Agjencisë së Blerjeve të Përqendruara, Edlira Naqellari, për t’i kthyer telefonin celular, i cili i ishte vendosur sekuestro edhe me vendim të shkallës së parë të GJKKO. Naqellari u arrestua së bashku me 7 ish-zyrtarë dhe zyrtarë të Ministrisë së Brendshme, pasi dyshohet se kanë shpërdoruar detyrën për tenderin 2.8 mld lekë të uniformave të Policisë së Shtetit.
“Gjykata e Posaçme e Apelit për korrupsionin dhe krimin e organizuar, bazuar ne nenin 212/2 të k. pr. penale, Vendosi: miratimin e vendimit nr. 274, dt 02.09.2021 të Gjykatës së Posaçme të Shkallës së pare për Korrupsionin dhe Krimin e organizuar”, thuhet në vendim.
Në vendimin e shkallës së parë thuhet se në telefon mund të ketë prova të vlefshme për hetimin, dhe Prokuroria ka të drejtë ta ekzaminojë.
Naqellari pretendonte se celulari nuk përbën provë, pasi aty ka vetëm të dhëna personale, por gjykata argumentoi se në telefonin e saj mund të ketë prova të rëndësishme që mund të ndihmojë hetimin.
Naqellari u arrestua në 10 korrik bashkë me 7 persona të tjerë të akuzuar për “shpërdorim detyre” dhe “shkelje të barazisë në tendera”.
