Nga 20 shtatori, tensionet në veri të Kosovës janë rritur që kur Qeveria e Kosovës vendosi masën e reciprocitetit për targat nga Serbia. Kjo masë po kundërshtohet nga qytetarët serbë, të cilët kanë bllokuar rrugët që çojnë për në pikat kufitare Jarinjë dhe Bërnjak. Misioni ushtarak i NATO-s në Kosovë, ka thënë se ka rritur numrin e patrullimeve në gjithë Kosovën, përfshirë edhe pjesën veriore.
Kryetarët e Komunave Veriore, janë takuar sot me komandantin e KFOR-it, Franko Federicin.
Në njoftimin e Listës Serbe thuhet se kanë kërkuar nga gjenerali Federici, që të mbeten neutral dhe të përkujdesen për siguri.
“Kryetarët e Komunave Veriore i kërkuan Federicit që të mbeten neutral, dhe të veprojnë në përputhje me rezolutën 1244 të Këshillit të Sigurimit të Kombeve të Bashkuara.
Është e nevojshme që për shkak të serisë së incidenteve të shkaktuara nga forcat speciale ROSU në ditët e mëparshme, prania e KFOR-it të forcohet në mënyrë që të parandalohet incidente të tilla.
U bëjmë thirrje qytetarëve të qëndrojnë të përmbajtur, e të mos bien pre e provokimeve. Komandanti i KFOR-it na ka thënë se KFOR nuk do të ndërhyjë në çështje politike, dhe nuk do të heq pengesat në rrugë”, thuhet në reagimin e Listës Serbe.
